達明一派重組慶20周年 Kelly周杰倫搶期開騷搵銀 21.02.2004

[太陽報]

隨著本地經濟復甦，娛樂事業亦愈趨興旺。今年樂壇不少天王天后級人馬，均已計畫舉行演唱會，當中最矚目的算是台灣小天王周杰倫、陳慧琳及為二十周年紀念而重組的達明一派等，相信屆時會掀起撲飛熱潮。

今年的本地演唱會非常興旺，除台灣小天王周杰倫（Jay）在十一月再踏紅館外，陳慧琳（Kelly）計畫在十二月開騷，紅館已批出檔期；其他舉行個唱的歌手，還有三月的葉蒨文、四月的任賢齊、七月的鄭秀文、十月的郭富城，劉德華則暫定在八、九月間舉行，可謂百花齊放。

雖然早前有傳Jay因為電影《頭文字D》導演臨時易角，由徐克變為劉偉強而決定辭演，但香港Jay迷也不愁無機會接觸偶像，因為他決定十一月再踏紅館，舉行第三次香港個唱。由於上兩次的演唱會大受歡迎，門票迅速售罄，演唱會之父張耀榮近日力邀Jay來港獻唱，據知雙方已傾得七七八八，只欠動筆。另外，今年是「達明一派」成立二十周年，黃耀明與劉以達這對老拍檔已決定重組樂隊，並舉行一連串的慶祝活動，當中包括年底推出全新唱片及紅館開騷。

關淑怡個唱Hold住先

而甄妮可說是一波三折，本來她打算去年開騷，並由丘亞葵主辦，最後因鬧不和而告吹。甄妮遂計畫今年五月自資開騷，但世事變幻無常，早前有指二人和好如初，個唱重新交由丘主辦，卻突然再傳丘被飛出局，個唱落實由張耀榮製作。丘亞葵接受本報電話訪問時說︰「同甄妮本來傾好，但佢話之前我都幫佢搞過騷，今次不如留畀張耀榮搞。我同佢冇反面，我仲有聯絡佢搞慈善騷。（關淑怡幾時開騷？）佢未有新碟出，個唱會Hold住先。」而張耀榮亦承認為甄妮開騷，他說︰「係我主動搵佢，陳慧琳都落實左十二月開騷，周杰倫都差唔多傾掂啦！」

關淑怡冥想 12.02.2004

[壹周刊#727]

講足成年話會復出關淑怡，聽聞佢四月會紅館開個唱，成唔成事八珍都唔敢講，事關佢大小姐性情飄忽，話嫁又唔嫁一時一樣，行為又古古怪怪，經常一支公去coffee shop邊飲咖啡邊煲煙幾粒鐘，或者車由香港去九龍再剷入大嶼山環島遊，都唔知搞乜！

上個禮拜六（七日）下午四點，關淑怡搞搞新意思，改去跑馬地奕蔭街一間有牛肉賣有餅食又有咖啡飲鋪頭歎茶，佢一邊聽住discman，order杯咖啡再點住支煙但又唔食齋燒度閉目冥想。

呢個化境「甫士」，關淑怡足足keep半個鐘，其間有兩個差人哥哥行過，都忍唔住望佢兩眼。眼又唔返屋企，即使真係冥想，牛肉店coffee shop都唔會係合適地點，你話關淑怡係咪要睇醫生呢呵！