關淑怡多人撐經濟冇問題 18.06.2010

Shirley離開星娛樂唱片後，未有簽新公司，似乎未有着落，因而傳她經濟出現問題，要向朋友借錢。聽到這個傳言，Shirley沒有嬲怒，反而哈哈大笑，更幽默地說︰「雜誌講借錢畀我嘅嗰個人，我根本就唔識，亦唔知佢係邊個，講到佢有大把錢，不如介紹畀我，等我嫁埋畀佢啦。」

否認玩失蹤
Shirley強調本身經濟完全冇問題，況且一向都不是大使之人，只係啲人鍾意以訛傳訛。她繼續搞笑：「我知大家好擔心我，但唔使驚，如果有朝一日係咁，我點樣都仲有屋企支持，又大把親戚，唔使問朋友借，所以唔使擔心!」對於不時圍繞她的傳言，她已表明明白娛樂圈係是非圈，自己問心無愧，總之自己從無失場及無玩失蹤!

另一傳言指離開了星娛樂的何哲圖想與她再合作，她表示彼此無接觸過，只是傳言，並透露現與一、兩間公司傾緊合作，但未簽約，所以未能透露。提到簽新公司，她有感而發：「好多人以為我獅子開大口，好老實講錢從來都唔係我嘅大前提，我希望嘗試新嘢，我係想搵一啲可以合作到去試新嘢嘅公司，過往香港最犀利嘅地方係國際化，呢樣嘢要做番出來，唔係做K歌。」

繼續出唱片
Shirley再三強調自己為做音樂犧牲了好多，但她無悔，亦向喜歡她的朋友歌迷派定心丸，她說：「我唔會放棄出唱片，我會做番我嘅音樂，屬於關淑怡嘅音樂，唔會嘥時間喺無厘頭傳言之中。」

 Shirley強調自己不是大使之人，故經濟沒有如外間所說出現問題。

Shirley稱轉了新公司後，希望能嘗試新的音樂風格。