~ Shirley因我行我素而被封神化天后，但她早已睇化，道行高深！
音樂沒有年齡和性別界限，關淑怡及麥浚龍相差18年，竟出奇地合拍。或許兩人怪味相投，前者被標籤為神化天后，後者被視為另類歌手，但他們懶理外界看法，只因早已由神化轉為睇化，道行出神入化！
近 年麥浚龍（Juno）雖看似不太活躍於幕前，其實他暗地裏計劃多多。對於能與關淑怡（Shirley）「跨年代」合唱《鎖骨》，Juno表示兩人早於五年 前相識，但至最近才正式合作，並不認為是「遲來的合唱」。問到與Shirley合作是否感壓力？他說：「冇喎！同佢產生化學作用，我覺得我哋唔只翻唱大家 嘅歌，應該擁有一首合唱歌，我同佢07年同台演出，今次已經係第二次合作，呢幾年變咗朋友，大家『氣味』相近，都喜歡呢類型曲式。」
對於 Shirley被指言行「神化」，Juno力撐：「佢唔神化，反而我仲神化，我同佢私下溝通，佢好Normal，好記得第一次同佢傾偈，傾到天南地北。」 至於誰的性格較冷酷？他爭住認：「我Cool啲，我哋『臭味相投』。（佢好多負面報道？）我唔睇新聞亦唔會猜度佢，我係Cool同慢熱，好多活動都係一個 人做得到，好似睇書同睇戲。」
揀女愛睇腳
眼前的Juno愈見成熟有品味，雖然與Shirley年齡相差甚遠，但兩人毫無 隔膜，採訪時你一言我一語。問到是否特別欣賞女性的鎖骨，Juno說：「又唔係噃，反而我最鍾意睇女仔隻腳，我覺得女性總有一個部位吸引另一半，呢首歌 （指《鎖骨》）情慾意味好強，對我嚟講，女性着衫感覺仲強烈過全裸。」
除了唱歌外，近年Juno亦專注拍戲，雖然並非部部大收，但亦有好 口碑，對於擔綱的電影被指叫好不叫座？他說：「好電影未必一定賺錢，賺錢嘅戲又未必係好電影，作為投資者，梗係想電影賺錢，但好難衡量電影成功失敗，視乎 投資者點睇，我嘅能力係演同唱，每首歌同電影有佢嘅生命。」
談到日本AV女優蒼井空成功洗底，並往內地發展，曾與蒼井空合作的Juno為她感高興：「我哋間中有聯絡，同佢拍戲時，我知佢係有思想嘅女仔。」
對感情Serious
自 從與混血模特兒女友戴庚玲甩拖後，Juno的感情生活仍未有着落，他說：「其實工作以外，親情、愛情及朋友對我都好重要，感情方面我睇得好 Serious（認真）。近兩年我培養咗個習慣，就係會陪媽媽食晚飯，食飯嗰陣我會熄手機或調校靜音，以前我係唔會咁做，依家變成我嘅生活模式，我要抓緊 自己嘅私生活，因為私生活會令我嘅工作變得更充實。」
後記：聽「龍」歌笑了
鏡頭前的Juno雖然酷到震，但鏡頭後的他相當健談，尤其是談到《耿耿於懷》、《沒有人》和《有人》等屬於他的經典「龍」歌時，更加眉飛色舞，當有人隨意哼起《耿》曲的副歌時，Juno也滿意地笑了！
入行逾廿年的關淑怡（Shirley），憑藉「出神」唱功及前衞形象，早已俘虜樂迷心，但她的私生活更惹人關注，一舉一動向來是話題焦點，其親生子父親的揭秘、獨自煲煙聽歌的「怪行」，均是市民茶餘飯後的熱話。
然 而Shirley「道行」極高，懶理外界的睇法，對於被指為「神化」，她自有其一番個人見解：「神化？睇你點睇啦！啲人覺得我戴住超大嘅耳筒、邊聽歌邊飲 咖啡會奇怪，其實以前（指90年代）都係咁戴啦！我係Hi-Fi友，I really want to relax，嗰個係我嘅Break time，而且得嗰度食得煙！（唔開心？）我只係覺得乜原來咁都叫『神化』？我只會當佢係一個話題。（戒煙？）戒咗話你知，但我Prefer慢慢戒，之前 用過戒煙貼，但唔Work。」
搭盡老中青
撇除所謂「神化」行為，Shirley實力和感染力毋庸置疑，翻唱經典金曲的功力尤為深厚，甚至比原唱者有過之而無不及；此外，她亦是一位「百搭天后」，先後與李克勤、黃耀明、草蜢、謝安琪甚至李香琴都合作過，連她也笑說：「其實我又真係幾百搭！」
最 近Shirley與麥浚龍（Juno）合唱《鎖骨》，擦出意想不到的火花，外界反應理想，兩人雖然相差18載，但無論唱功、感覺及性格上也出奇合拍，毫無 代溝，她更對Juno讚不絕口：「佢表現好好，把聲好Sexy同Charming，大家合作有火花。（同Juno有代溝？）冇喎！溝通唔到點唱歌呀？我同 阿Y（黃偉文）都冇代溝，呢首歌係我近年滿意嘅一首歌，佢畀我同琴姐（李香琴）之前嗰首，更似我做嘅嘢。」
冇放棄樂壇
近 年樂壇處於青黃不接，作為前輩歌手的Shirley則力撐：「我覺得依家樂壇OK喎！Getting better，其實無論男女老幼都好，應該畀番少少信心香港樂壇，我都做過新人，亦畀人踩過，但我冇諗過放棄，Music Never Die，好多人要求執音，但歌手畢竟係人，會有狀態、唔舒服，唱現場時會發台瘟，腦海無啦啦Blank（空白），我認為錯咗唔緊要，人誰無錯？我唔 Mind畀人話甩音，琴都要Tune啦！其實我睇到好多樂迷係Enjoy音樂，多過挑剔音樂。」
對於她與林憶蓮同被指為「Gay Icon」，Shirley欣然接受：「其實好多人都有咁講過，但我又冇特別去諗，That's good，大家一齊玩仲好。我身邊好多Gay朋友，佢哋Open-minded，接受能力好強、又有好多得意Idea、有幽默感，I like that！」
後記：講嘢有Point
不熟悉Shirley的人，會認為她「神化」及難相處；喜歡她的人，則大讚她我行我素有性格。事實上，Shirley予人外冷內熱之感，其實她絕不寡言。採訪當天，Shirley對答詳細兼有Point，甚至會向你吐出心底話，實屬難得！
出位歌姬臣服粉絲
「神化」及「有型」往往一線之差，圈中不乏我行我素歌手，同樣獲得樂迷認同。
范曉萱
有「小魔女」之稱的台灣歌手范曉萱，出道時予人清純感覺，惟往後她紋身紋上癮兼愛釘環，但憑音樂才華受樂迷愛戴。
王菲
「神級天后」王菲言行曲風和衣着打扮，向來別具一格，雖然被亞洲粉絲朝拜多年，但她不稀罕：「我不是偶像，別崇拜我！」型到震！
No comments:
Post a Comment