關淑怡（Shirley）近年常受負面新聞影響，導致早前發生在facebook留言自殺震驚娛樂圈。事過境遷，今日Shirley細說從前，她的領悟是父親與囝囝是她的精神支柱，令她明白自己的存在價值，不再為無謂的是非而受盡困擾。醉心音樂的她，開演唱會與歌迷一齊投入她的音樂世界，讓大家真正了解她。
親情
當時我覺得好辛苦，幾乎崩潰，冇可能叫人理解我，有人就有是非，初頭我本着清者自清，謠言止於智者，可惜現實不是這樣，嗰件事（自殺） 後同我傾得最多係家人，特別係爹哋，佢經驗比我多，教我點去面對，好似多年前我突然放棄唱歌，係因為當時為咗工作，無法見感情要好嘅爺爺最後一面，令我覺 得好遺憾。我好珍惜同家人關係，所以突然間不唱，嗰時真係無法子再唱，之後停咗好多年，但我真係真心鍾意音樂，所以再唱。對囝囝不報憂
雖然件事鬧得好大，經理人以為我跌咗落山，其實係我想自己靜幾日，囝囝唔知道，佢無察覺到，因為我唔會畀佢睇到我唔開心。佢係 我精神支柱，而I'm glad（我好慶幸）好快就知道，做乜為咗啲唔鍾意我嘅人，而去浪費自己，我都有我嘅value（價值），唔會低估自已，亦唔可能改變人哋對我嘅睇法。領悟
囝囝唔係我粉絲，我感恩，（會諗）咁仲好，（哈哈大笑）太過覺得媽咪係偶像，有負面效果，我要佢叻過我囉！但無可否認，囝囝有 音樂品味，他識揀歌聽，甚至有些我都未聽過，有啲新嘅band都係佢叫我聽嘅，Adele、Justin Bieber嗰啲好大路，佢唔聽嘅。除咗音樂，佢電腦、畫畫都叻，揀歌有sense，講過想做乜，但不能透露，唔係音樂方面。現時得10歲，未有愛情問 題，雖然我係single媽咪，但唔擔心他問關於性問題，個個都會經歷，我無諗過點同佢解答，留番畀我父母同佢講，小時候問過爹哋問題，但愈大愈唔問，佢 好貼心。唔會排斥愛情
真係咁多年都無對任何人動過心，有人問我唔悶咩？我唔排斥愛情，但唔會好渴望。我唔會覺得悶，我可以坐幾個鐘頭，聽下歌，飲下咖啡，觀察下周圍嘅人。我信奉藏傳佛教，有咩啟示？係令我明白you must have to let go，無一樣嘢屬於你嘅，記者問我係咪諗得太多，做得太少，甚至有時候諗多咗？我會話諗多嘢不只我一個，人係「簡單複雜化」，everyboby plays that game。
誣衊
寫我失蹤、失場，呢啲直接影響我信譽！以前喺寶麗金咁多年都無事，但依家又寫我欠債，首先我要澄清無件咁嘅事（欠債），我想問 下大家會不會諗下，如果真係我朋友會不會講出嚟？講出嚟呢個又係咪我朋友呢？經濟上我係OK嘅，唔需要父母支持，我有出去登台、有賺錢，但咁寫對我影響好 大，名譽與誠信對一個人好重要，當時差啲崩潰，之後我覺得好鬼蠢，根本無件咁嘅事，點解畀呢啲是非困擾咗咁耐，仲畀咗咁多麻煩我！why not我唔企出來講，表明立場？澄清
最近先聽到一個關於我「失蹤」嘅事，話說幾年前有雜誌透過我「朋友」約我影封面，嗰個「朋友」代我應承，當雜誌準備晒所有嘢， 嗰個朋友就同雜誌講我唔影，當然雜誌覺得我唔專業、失場，件事直至最近，當我經理人Marianne同我約訪問，先喺雜誌編輯口中知道件事，我就一直被蒙 在鼓裏，外面嘅人根本唔知呢個「朋友」同我根本好耐無聯絡。另一件事係有朋友先斬後奏，同傳媒透露請咗我做嘉賓，但其實我都未答應，咁樣焗我上，我都好無奈。
解塔羅牌之謎
至於黃偉文（阿Y）話我「聽塔羅牌話，唔唱佢嗰首歌」真係好鬼好笑，阿Y一年前嚟講佢首歌，但一年後先嚟叫我唱，但係當時我簽咗畀李進，版權所限唱唔到，我就求其作咗個理由話塔羅牌叫我唔好唱囉！點知阿Y當真，所以到依家阿Y都仲講笑：「得啦，你問咗你副塔羅牌未？」口述：關淑怡
筆錄：Wendy Ng
攝影：沈健程
髮型：Calvin Chan@M.i salon
化妝：Navi Lam
手錶：Philip Stein
場地：如心艾朗酒店
Shirley曾選擇於當紅時期退出樂壇，原來是對逝去的祖父於心有愧，親情至上。
關淑怡早前在facebook留言想自殺，令關心她的好友大為緊張。
Shirley口中叫得親切的阿Y就是Wyman，相熟程度可想而知。
No comments:
Post a Comment