我主場 曾想退出樂壇喊過自殺 關淑怡：Let it go! 12.12.2015

[蘋果日報]

關淑怡生活低調，近年愛在社交平台寫個人感受，當年隱退誕下私生子關浚賢，一直不回應生父是曾志偉的傳聞。有天，她揭盅兒子生父是寧波車；之後她又稱被助手辱罵，感覺不受尊重要退出；更曾揚言自殺，行為出位。飄忽的情緒和私生活，令沉寂一時的她在娛圈人氣再升。她，我行我素，對音樂熱誠不減，本月底她將與顧芮寧及王憓合作開中樂音樂會，日前為宣傳接受本報專訪，但被問舊事，她卻立即落閘說：「Let it go！」

關淑怡為宣傳於本月27日舉行的中樂音樂會，一日內接二連三的做專訪，平均每個訪問延遲一小時。見到不認識的媒體準備期間，她一眼都不望，只跟自己工作團隊交流，率真性情掛於臉上。關淑怡做訪問時先禮後兵，講明只談音樂：「除此之外冇其他嘢傾。」談一點生活吧？她說：「唔得，閘住先。」從來一心專注在音樂事業的她，選擇在社交平台抒發跌蕩的個人感受，其實更吸引看娛樂版的「花生友」。

「音樂要畀空間artist」
活在花碌碌的娛樂圈，不能如願地單一談音樂，要私生活做「調味」，她淡淡然說：「廿幾年，都慣咗，我覺得要睇開啲，冇乜所謂。」破格的人或許不想活在別人的框框下，她亦沒打算衝破現在模式：「冇諗過想改變啲乜，每個artist都唔一樣，都係人，冇得mould出嚟，出嚟做音樂，但方向不是你嗰邊。」
她在訪問中不時夾雜英文，盡力表達：「其實你，音樂唔可以太……要畀空間artist，佢哋要有自己，音樂in somewhere係幾主觀，一定要畀空間佢哋，呢個係最佳方法去protect佢哋、去錫佢哋、保障佢哋，音樂本身係language，唔需要講太多，講得多都唔係真。」所以關淑怡面上從來少掛上笑容，訪問時被問不願答的問題，她低頭玩手機。

雖然口裏掛着「take it easy」，要放鬆一點，但也有心灰的時候，關淑怡曾意興闌珊地在社交網留言寫要「quit」，又喊過自殺，她說：「你見我坐喺度，唔使講，you know。」人的思想起跌可以好大，或許只是某一刻有此念頭吧？關淑怡突把聲量調得更低，說不太記得。問她是想忘記過去？還是已把心理調整了？她說：「No，如果你問我好私人嘅問題，我今日唔係好想答，如果你問音樂會我會講。有啲嘢太耐，有啲嘢唔想再講，just let it go。」

「有啲嘢唔想再講」
私生活不談，講音樂關淑怡談得較暢快，今次與中樂合璧，甚麼吸引她演出？關淑怡說：「近呢10年公開演出，都係一啲好pop嘅嘢，中樂我唔識、唔係好叻，我接觸western music多啲，今次有咁嘅元素，覺得可以develop吓，亦可以係一種新approach，for the future係可行嘅，我覺得OK，否則都覺得係something new可以try，做一個騷唔係好難，no harm to try。」

顧芮寧入行不久，今次跟前輩關淑怡合作做騷，對於關淑怡曾被指難相處，她說：「之前我識佢，因為聽佢嘅音樂，冇睇報紙，佢好有自己character，同佢溝通都係好簡單，傾音樂嘢同音樂理念。」在旁的關淑怡和應：「就係咁簡單嘅事，係你哋（傳媒）講得太複雜。我都唔知點handle你哋。其實係好簡單，同埋你哋諗太多，我接觸某啲傳媒都係。有啲嘢太耐唔想再講，just let it go。」

 關淑怡日前為本月底的中樂音樂會接受本報專訪，談起音樂暢所欲言，但一提私生活即落閘拒談。

與前輩關淑怡首度合作的顧芮寧（右），指對方很有性格，亦容易溝通。