關淑怡拋波搏盡 開騷袋百萬帶仔返美 05.02.2016

[蘋果日報]

關淑怡事事以兒子為重。今年四月的個唱，有指也是為了寶貝仔撲學費而開。據了解，關浚賢除了讀書成績好，還遺傳了媽咪的音樂天分，十二、三歲已懂得彈琴作曲，為了栽培他，關淑怡過去一年密密接騷，儲定學費及生活費，準備今年送兒子到美國讀書。大條道理搵得就搵！去年十二月跟二胡大師王憓孖住開騷的關淑怡，四月紅館再唱，四十九歲拋胸影海報谷宣傳，擺明最後一搏。

「Shirley諗住唱完香港再走多round美加、馬來西亞，巡迴賺一筆，儲多啲彈藥俾個仔去美國讀書。Shirley媽咪上年過咗身，再唔使牽掛老人家，所以佢會陪埋個仔去嗰邊住，一走可能幾年都唔返嚟。由中學到上大學，學費同兩母子生活費條數好襟計，加上大家都睇住佢個仔大，所以一吹雞，好多主辦單位都撐，大家都想幫Shirley搵筆錢，等佢兩母子可以安心喺美國生活。」知情者說。據了解，暫定開兩場的關淑怡已穩袋一球（一百萬）歌酬，而今次參與主辦的更高達十個單位，大家眾志成城，為單身關淑怡撲水。