49歲關淑怡( Shirley)性格飄忽，入行25年來多次退隱同復出，2000年更成為未婚媽媽，亦曾經嗌自殺又經常玩失蹤，行為非常嚇人。4月23日，Shirley將舉行演唱會，坦言會在演唱會上剖白成長過程及內心世界，好讓Fans了解真正的關淑怡，問到會否公開澄清負面傳聞，她一臉懶得理你：「傳言就係傳言，有乜好解釋？」
採訪：方騫平 攝影：李維隆 場地：紅磡都會海逸酒店
Shirley強調花心思度Rundown，有別於一般演唱會的刻板模式，除演繹《繾綣星光下》及《難得有情人》等經典歌外，還有一Part玩感性的剖白成長過程：「啲人以為我好快走紅好幸運，其實我都有經歷過挫敗，亦面對過種種不利傳聞，呢啲都係令我茁壯成長嘅課程，希望可以啟發到年青人，好多嘢係要捱返嚟。25年嚟最辛苦應該係做乜嘢都唔太順利嘅時候；最開心係搵到新嘢，所以我會睇好多書去增值自己。」接着Shirely反問記者：「我問你『我賺錢定錢賺我？』嗱！呢啲唔係黎明金句，我無佢咁金，隨意講吓啫，不過隨住生命同健康流逝，就算年紀大都要終身學習。」
傳聞無乜好講
問到關淑怡會否在舞台上澄清傳聞？她即說：「其實大家唔需要知我O依家點？以前點？我個人點？將來又點？Come On……根本就係搵我哋笨，傳聞無乜好講，咪由得佢囉，使乜講咁多。」問到可有被不利傳言困擾？她有點唔耐煩：「以前開金口解釋咗十年，以前仲辛苦啦。我唔知點解啲人對我有咁多揣測，連自已都估唔到。」至於現階段情緒及壓力問題係咪已解決？她就答得老實：「我話好開心就呃你嘅，因為我都錫已故嘅媽咪，有時都有想唔通嘅時候，無人估到生命會係點……總之我有我方法（去解決），I'm fine！無必要去解釋，我無神秘，工作唔係我人生嘅全部，我仲有屋企人同埋我嘅生活，O依家我好OK，有休息亦有工作。」
喜歡樂壇熱鬧
黎明、黃貫中、林峯及謝安琪等亦於4月開Show，強敵當前，Shirely無擔心過，「Why Not？我覺得好正，樂壇好耐未試過咁熱鬧，我都係做好自己演出本份，其他事交畀團隊處理，我好享受籌備演唱會嘅過程。雖然已第五次開演唱會，由於每個時段都會有新元素加入，所以會有無窮無盡嘅構思。」有傳這是Shirley最後一次開演唱會，睇嚟純屬傳聞。
關淑怡keep fit全力以赴，但未知到時有幾性感示人。
關淑怡接受訪問時笑得開懷，不過她坦言有壓力未解決，會用自己方法紓緩，大家唔使擔心佢。
Shirley似足女版黎明，講嘢同樣好玄。
關淑怡滿意現狀，之前又同新人顧芮寧在《感覺。國樂 中西薈萃音樂國度》音樂會上演出。
No comments:
Post a Comment