1995 難得有一個關淑怡演唱會，1995 年係 Shirley 第一次喺紅館開演唱會，叫做「難得有一個關淑怡演唱會」，個名都係想人REMIND 佢首大熱作「難我有情人」，我當時剛剛考完 A-Level，由於當時唔係好有錢(依家都唔係)，所以只買左一場睇咋，我買嘅係第 4 場，即係最後一場，呢次都係我第一次真金白銀用自己錢買飛睇既 concert 呀，我記得我買左$200 飛，同一個中學同學去睇。我記得呢個 concert 嘅記者會上，Shirley 染咗個綠色嘅頭，當時話係有原因既，因為 1995 年係 Shirley 入行 6 年，又係 6 月開演唱會，所以就染咗個綠頭。之後我重記得電台不斷有宣傳，商台重幫 Shirley 製作特輯，同搵 Shirley嘅好朋友分享佢地對 Shirley 嘅感覺同對呢個演唱會嘅期待。
1995 年 6 月 9 日，第一場演唱會開鑼啦!之前好多人都期待 Shirley 嘅髮型會好特別，不過在開 show 時 Shirley 竟然染返黑色，可能都係想以歌為主 ! 由於我第一場至第三場都冇去睇，所以都係喺報紙睇到啲相同報導 ! 不過當時真係好期待! 因為第一次用自己錢去買飛支持歌手! 1995 年 6 月 12 日，我終於等到啦，到最後一場啦 ! 一入場第一個感覺就係: 哎呀!我個位離個台好遠呀!!!而且我個眼鏡嘅度數又唔係好啱!!!!(當時我唔會帶眼鏡返學，因為覺得好樣衰，所以久而久之個眼鏡度數就唔鬼啱)睇得唔係好清楚囉!!!!不過都冇影響我期待嘅心情。等左一陣，終於開 show 啦，全場突然熄燈，當開返嘅時候，Shirley 已經坐左喺度，第一句就簡單而直接講:「Hi ! 先送 3 首歌俾大家 ! 」當時佢身後嘅大大塊白布就投射上不同圖案，好鬼死靚呀! 3 首歌之後，佢就講: 「今晚個演唱會正式開始!」我個 friend 即刻問我 : 「咁之前唱啲歌算係咩?」 佢呢個問題令我覺得好好笑 。之後白布徐徐墮下，舞台先出現係我嘅眼前 ! 我第一個感覺就係: 好多部電視呀! (正式開始後啲電視會播不同圖案、Shirley 個樣同埋特別效果)當演唱會正式開始之後，Shirley 就吊威也開始唱「星空下的戀人」 ，當唱到「午夜狂奔」時，我見到 Shirley 突然隻腳屈左一屈，我係第二日商台嘅訪問(第二日就要做嘢冇得休息!慘)先知道原來佢真係屈親，返屋企至知瘀左一大塊，不過當時佢依然繼續又唱又跳 ! 犀利 ! 我睇嗰場係比較著數，因為多咗好多嘢 ! 佢喺唱「戀一世的愛」時，換左一件有少少幻彩嘅褸，而且裡面原本嘅白色衫都換左同一質料既衫添。喺「驚世感覺」嗰 part 時，我覺得嗰啲怪人令我有少少不安 ! 不過個概念好好，講都市節奏太急速，人與人之間欠缺溝通，將來就會變成一個奇怪嘅世界，最後所有怪人好似跳樓之後就係重生，再唱出「梵音」，絕! 之後 Shirley 再出場唱「李香蘭」時，唱左一段，突然個台以好急嘅速度降左 Shirley落去，跟住聽到張學友把聲，原來係張學友出場(四場 show 唯一一晚有嘉賓)!!!!嚇死! 以為機件故障添!! 翻唱歌嗰 Part 唔知點解最後「把歌談心」會冇收錄係 CD 度!! 另外唱咗半首嘅「窗內窗外」都令我聽出耳油! Shirley 講嘢唔叻係人都知，不過佢唱「人生可有知己」之前講咗好多心底話，雖然我覺得佢冇乜組織，我都有啲唔明，不過亦反影嗰啲真係真心話，唔係稿! 而當唱完「繾綣星光下」之後謝幕時，跳咗隻答謝觀眾既舞，之前幾場都冇。之後 encore 兩次之後，我都以為完啦，場館啲人開始走，點知行到差唔多到出口時，Shirley 突然又出返嚟 ! 我就企喺好近台嘅地方繼續睇囉!!望得 Shirley 清楚好多呀!!!Shirley 講咗好多感人嘅說話，重喊呀!!!個氣氛真係幾好鬼感動 ! 唱完「當世界無玫瑰」之後，以為真係冇啦，不過重未捨得走，點知 Shirley 真係再出嚟呀!!!! 再唱多次「難得有情人」。唱完之後就開唒燈 ! 真係完啦 ! 成晚 concert 俾我嘅感覺好好!!! Shirley 表現得真係好出色，比初出道唱live好左好多！9 月終於推出演唱會 CD，呢度就只講返呢隻碟。買之前都知道曲目一定會比演唱會時少好多，到我知道呢隻碟嘅 Song List 時，覺得有啲奇怪，點解演唱會裡面「驚世感覺」嗰 part 啲歌好似 cut 唒，淨返首「梵音」，要欣賞呢 part 嘅人就要買 LIVE version既 LD 先有啦!同埋 LD 個 Run Down 係最正確同比 CD 多!講返歌，我就最喜歡「梵音」同「人生可有知己」，「梵音」比 CD 裡面版本唱得重出色，由其係"wu ar wu ar" 嗰段，唱得更長氣! 好正!而「人生可有知己」就係氣氛最好，聽完會覺得感動!我當年係睇最後一場，亦係呢隻 CD 錄嗰場，我覺得當時最多掌聲，氣氛最好嘅就係唱呢首歌嗰時啦!另外值得留意就係，Shirley 唱「假的戀愛」之前玩野，唱左「我盡量，唔食太多豬腸」，我當時真係估唔到 Shirley 會搞笑!呢段搞笑歌詞我記得係湯寶如喺"歡樂今宵"扮 Shirley 喺"1993 第四季季選"個造型唱"假的酒菜"!!（2003年）
by Tommy Ho
No comments:
Post a Comment