Saturday, May 17, 2003

關淑怡搵男人 「鵝」左四粒鐘 16.05.2003

[忽然1周#407]

近年關淑怡成日畀雜誌影到經常一個人出現銅鑼灣怡東酒店coffee shop,每次見親佢,唔係狂煲煙就係不停煲電話粥,渾渾噩噩又一日。

上個禮拜,晏畫三點關淑怡又怡東打躉,之但係身邊多個中年男人,好明顯,呢個男人唔係關小姐新歡,其間關小姐滔滔不絕,個男人就全程做聽眾,唔知係咪關小姐話題沉悶,佢似乎好唔耐煩,不斷捽鼻、托腮兼周身郁,又多次離開座位傾手提電話,每當友人行開時,關小姐就聽Walkman解悶。

關淑怡係咁煲煙,四個鐘未停過!

佢位男性朋友,聽佢講,聽到好唔耐煩,頻頻捽鼻。

唉!關小姐!一世流流長,就算唔做歌星,搵其他細藝!再係咁,唔係辦法!黃昏五點左右,關淑怡本來埋單,但講講又再叫多杯飲再傾過,而佢位男性友人,惟有繼續做聽眾,直至7時幾,關淑怡終於肯走人,而男性友人就一副甩難模樣,未待關淑怡車就匆匆同佢道別跳上的士。

三十幾歲女人,冇家庭、冇事業兼冇拖拍,成日戇居居一條「冷」,唔怪得嘮囌特別多。但係嘮囌太多,朋友都怕你啦,做人太得閒真係唔係一件好事!