Monday, February 25, 2013

關淑怡中男繾綣樓梯間 24.02.2013

[太陽報]

單親媽咪關淑怡近年感情冇着落,Dry到裂的她前日突然有中佬埋身,陪她漫步碼頭乘渡輪回家。二人打扮襯絕,全程並肩而行,中佬更柔情叮嚀她小心樓梯級,只差在未一手拖實伊人,但已足以令她甜笑!

現年46歲的樂壇天后關淑怡(Shirley)感情生活一直成謎,早年分別與李克勤、鄭中基、黃家強及曾志偉傳出緋聞,不過個個結晒婚,緋聞明顯流過流口水!Shirley自搬往距離市區甚遠的愉景灣後更是深居簡出,專心撫養12歲大的兒子關浚賢,身邊異性更幾乎絕迹!近年兒子日漸長大,再度活躍樂壇的Shirley似乎不甘心Dry落去,早前問到會否接受新戀情?她坦言不會抗拒有追求者,看來已Ready等愛,只欠襄王追求!

「情」天不負有心人,Shirley放風冇耐,身邊即有高大猛男出現!前日下午4時許,一身黑色型格打扮的Shirley現身中環,赫然發現身邊有一位中佬結伴同行,恰巧中佬同樣穿上黑色外套,如果冇襯過就印證心靈相通!
送到碼頭先肯走

現場所見,二人全程肩並肩而行,從商場漫步行向碼頭方向,只見中佬甚為幽默,不時主動講笑話搞氣氛,Shirley亦甚為受落,二人有講有笑,平時Cool爆的她更泛起絲絲笑靨,一副冧樣浮晒面!行到樓梯間,中佬更柔聲着Shirley小心睇路,雖然沒有伸手攙扶,加上幾步樓梯級而已,不過仍顯得十分緊張,關愛之情係人都Feel到啦!

梯間小溫馨後,中佬更護送Shirley入碼頭,最後才揮手道別,認真癡纏!Shirley入碼頭後並不急於乘船返愉景灣,先去小賣部買煙,邊行邊拆包裝紙,然後施施然行去附近的便利店買飲品,跟着便走出室外吸煙,望着海一片吞雲吐霧,顯得滿懷心事,未知是否仍為感情事煩惱,還是在回味剛才的片段?

關淑怡(Shirley)與男伴甜蜜同遊,Dry足多年的單親媽咪,感情似乎再現曙光,其經理人王敏慧(Marianne)昨日接受長途電話訪問時表示,不清楚Shirley身邊男伴是誰:「應該係朋友啦?我一向都唔會過問藝人嘅私人事,不如你哋問番Shirley啦!」未知是否為保戀情才不欲多言!

向來努力工作的Shirley,完成本月初兩場紅館演唱會後,現時正在休假充電中,同時亦埋首新碟的工作,Marianne說:「依家收緊歌,應該會出EP。(係咪會做巡迴演唱會?)都應該會做,不過依家仲斟緊,未落實有邊幾個站。」

90年代樂壇天后關淑怡(Shirley),早年憑《難得有情人》、《繾綣星光下》及《人生可有知己》等唱到街知巷聞,事業輝煌一時,不過感情路上則有點失色!繼初入行時與前影星周文健拍拖後,她的戀情一直成謎,至2002年突然未婚誕下兒子關浚賢,震撼娛樂圈!十多年來她都不曾透露生父,外界曾流傳曾志偉及周文健是經手人,不過已遭當事人否認。Shirley的兒子亦從不過問父親是誰,幸母子關係良好,她曾自爆兒子因她工作增加而不高興,雖然不時投訴,但仍會等她收工。

No comments: